Jer 16 | ZomZIV | STEP | Tua ciangin TOPA thu kei tungah hong tunga:

Jeremiah 16

Gimna Ni

1 Tua ciangin TOPA thu kei tungah hong tunga: 2 “Hih mun ah zi pi kei inla, tanu tapa zong nei kei in,” hong ci hi. 3 Ahang in, hih gama suak tanute le tapate thu le amaute nu numeite le amaute pa pasalte thu tawh kisai TOPA gen hih ahi hi: 4 “Amaute sih-natna in a si ding uh hi. Amaute kuamah in kah loin kuamah in zong vui lo dinga, leilakah a ki-ek nusiat ding hi. Amaute namsau le kialpi-in simang ding uh a, a misiluangte uh huihlak vasate le leitung ganhingte an a suak ding hi,” a ci hi. ^a

5 Ahang in, TOPA gen hih ahi hi: “Misite inn ah lut kei in; vakahin na dahpih lam zong va lak kei in; bang hang hiam cih leh hih mite tung panin ka thupha ka itna le ka hehpihna ka dok kik khin hi, “TOPA in cikhia hi. 6 “Hih gam ah ulian uneu a si ding uh hi. A kivui a kikah om loin amaute hangin khat beek in a pumpi uh kuiliam lo ding uh a, a sam uh a met kei ding uh hi. 7 Misi kahte - a nu si, a pa site nangawn - hehpihna-in kuamah in an lui lo dinga, hehnepna-in tuisik zong a suah kei ding hi. ^b

8 “Tuateh pawi kibawlna inn ah ne-in dawnin a muitual dingin lut kei in. 9 Ahang in, TOPA Israel-te Pasian gen hih ahi hi: Note theih hun sung na muh tektekun hih mun ah lungdamna le kipahna awte le zineipa le mo awte ka beisak ding hi. ^c

10 “Hihte khempeuh hih mite tungah na gen ciangin amaute in, ‘Bang hangin TOPA in hihzah lawmlawma alian gimna a tunsak dingin khensat ahi hiam? Eite in bang khialhna bawl i hi hiam? TOPA eite Pasian tungah bang mawhna bawl i hi hiam?” ci-in hong dot uh leh 11 amaute tungah TOPA in, ‘Na pate un kei hong taisan uh a, pasian dangte zui-in a na semin bia uh hi. Kei hong taisan uh a, ka thukham zui lo uh hi. 12 Ahi hangin, note na pate uh sangin na uangzaw lai uh hi. En un, ka thu nong man tangun na lungsim gitlohna uh na zui tentan teitei uh hi. 13 Tua ahi ciangin hih gam panin note le na pate un zong a theih ngei loh uh gam ah kong lawnkhia dinga, hong angvan nawn lo ding ka hi manin tua lai-ah sun le zanin pasian dangte’ na na sem ding uh hi,’ ci hi. ^d

14 “TOPA in, “Bangbang ahi zongin mite in, ‘Egypt panin Israel-te a paikhiatpih TOPA nuntakna lo-in’ ci-a a kiciam tangun, 15 ‘Israel mite leilu lam pan le eite hong hawlkhiatna gam khempeuh panin hong paikhiatpih TOPA nuntakna lo-in,’ ci-in a kiciam hun uh hong tung ding hi,’ ci hi. Ahang in, a pute uh ka piaksa gamah amaute ka pi kik ding hi. ^e

16 “TOPA in, ‘Ahi hangin tu-in nga mante tampi ka kuansak a, amaute a man ding uh hi. Tuate nungah sabengte tampi ka kuansak dinga, amaute in muallian mualneute tung khempeuh le suangheng sungte a bengmang ding uh hi. 17 Amaute paina khempeuh ka mu a, kei muhna panin amaute kisel thei loin amaute mawhnate zong a sel thei tuan kei ding uh hi,’ ci hi. 18 Amaute gitlohna le a mawhna uh a zah nihin ka thuk ding hi, bang hang hiam cih leh amaute in nuntakna nei lo, a zumhuai milim bawltawmin ka gamsung ninsak uh a, a kihhuai a milimte uh tawh ka gouluahna mun teng a dim khin uh hi,” hong ci hi.

19 Ka thahatna, ka kulh muanhuai le
ka lungdon huna ka bukna TOPA aw, ^f
leimongte panin
minamte nang kiangah hong pai uh a,
“Ka pate un pasian maan lo le kimanna a nei lo, ^g
a hoih a bawl thei lo milimte longal bangmah a nei kei uh hi. ^h
20 Mihing in ama pasian ding bawltawm thei ahi hiam?
Bawltawm thei napi tuate pasian ahi kei hi!” a ci ding uh hi.
21 “Tua ahi ciangin amaute ka hilh dinga -
hih hunin ka vangliatna le
ka thahatna amaute ka hilh ding hi.
Tua ciangin amaute in
ka min TOPA ahilam a thei ding uh hi.